វៀតណាម៖ រដ្ឋមន្ត្រីក្រសួងសុខាភិបាល វៀតណាម លោក Nguyen Thanh Long បានបញ្ជាក់នៅថ្ងៃសៅរ៍ ទី២៩ ខែឧសភានេះថា វៀតណាមបានរកឃើញនូវគំរូវីរុសកូវីស-១៩ថ្មី ដែលជាពូជកូនកាត់រវាងវីរុសកូវីដ-១៩ មានប្រភពនៅឥណ្ឌា និងកូវីដ-១៩ មានប្រភពពីអង់គ្លេស។ មិនត្រឹមតែប៉ុណ្ណោះ វីរុសប្រភេទនេះអាចមានការរាតត្បាតបានយ៉ាងឆាប់រហ័សតាមរយៈខ្យល់។ នេះបើយោងតាមការចុះផ្សាយដោយកាសែត VN Express។

វៀតណាម គ្រប់គ្រងបានយ៉ាងល្អនូវស្ថានភាព កូវីដ-១៩ ក្នុងប្រទេសរបស់ខ្លួនតាំងពីឆ្នាំមុន ប៉ុន្តែយ៉ាងណាមិញ ចាប់តាំងពីខែមេសាមក វៀតណាមត្រូវតតាំងម្តងទៀតនូវរលកថ្មីនៃការវាយលុកដោយកូវីដ-១៩ ពោលគឺមានករណីឆ្លងថ្មីច្រើនជាង ៣,៧០០នាក់ ក្នុងទីក្រុង និងខេត្តចំនួន ៣១ នៃចំនួនសរុប ៦៣ ខេត្ត និងទីក្រុងរបស់ខ្លួន។

ក្នុងការដកស្រង់សម្តីមួយ រដ្ឋមន្រ្តីសុខាភិបាល វៀតណាមបាននិយាយថា៖ "ប្រភេទថ្មីនៃវីរុស កូវីដ-១៩ ត្រូវបានរកឃើញក្រោយពីការពិសោធន៍ របស់យើង ដែលជាវីរុសប្រភេទបំលែងខ្លួនថ្មី។ វៀតណាមគ្រោងប្រកាសពីការរកឃើញវីរុសប្រភេទថ្មីនេះទៅកាន់ពិភពលោកក្នុងពេលឆាប់ៗ"។

កន្លងមកវៀតណាមបានរកឃើញនូវវ៉ារ្យង់ (Variant) ថ្មីចំនួន ៧ប្រភេទរួចមកហើយ រួមមានដូចជា៖ B1222, B1619, D614G, B117 (វីរុសរកឃើញមកពីចក្រភពអង់គ្លេស) និង B1351, A231 and B16172 (ប្រភេទវីរុសរកឃើញនៅប្រទេសឥណ្ឌា)៕